hausla wajh-e-tapish-ha-e-dil-o-jaan na hua

hausla vaj.h-e-tapish-hā-e-dil-o-jāñ na huā

shola-e-sham.a tirī bazm meñ raqsāñ na huā

husn thā mast-e-azal jām-e-anā lailā se

tan kī uryānī se majnūñ koī uryāñ na huā

lab-e-mansūr se dī kis ne anal-haq kī sadā

tū agar parda-e-pindār meñ pinhāñ na huā

ham rahe chashm-e-ināyat se hamesha mahrūm

dil-nashīñ tīr-e-nazar kā koī paikāñ na huā

chashm-e-jānāñ meñ samāte haiñ samāne vaale

maut se aañkh laḌānā koī āsāñ na huā

dil hai but-ḳhāna-e-asnām-e-ḳhayālī 'sāhir'

tū vo kāfir hai ki bhūle se musalmāñ na huā

hausla wajh-e-tapish-ha-e-dil-o-jaan na hua

shola-e-shama teri bazm mein raqsan na hua

husn tha mast-e-azal jam-e-ana laila se

tan ki uryani se majnun koi uryan na hua

lab-e-mansur se di kis ne anal-haq ki sada

tu agar parda-e-pindar mein pinhan na hua

hum rahe chashm-e-inayat se hamesha mahrum

dil-nashin tir-e-nazar ka koi paikan na hua

chashm-e-jaanan mein samate hain samane wale

maut se aankh laDana koi aasan na hua

dil hai but-KHana-e-asnam-e-KHayali 'sahir'

tu wo kafir hai ki bhule se musalman na hua