hausle kyon na dil-e-charKH-e-kuhan ke nikle

hausle kyoñ na dil-e-charḳh-e-kuhan ke nikle

misl-e-yūsuf na phire jo haiñ vatan ke nikle

mar-miTe jo tirī ulfat meñ vo āzād hue

jiite jī bande se vo ranj-o-mehan ke nikle

maiñ to ḳhush ho ke evaz is ke duā.eñ dūñgā

muñh se dushnām jo us ġhuncha-dahan ke nikle

gāliyāñ de ke to kar pyaar se bāteñ ai shoḳh

ham to shaidā tire andāz-e-suḳhan ke nikle

sarfaroshoñ ko ḳhabar do sar-e-maqtal aa.eñ

haath meñ teġh liye aaj vo tan ke nikle

sarv-o-shamshād o sanobar jo khaḌe haiñ lab-e-jū

alam-e-sabz haiñ mātam meñ hasan ke nikle

ghar se ham apne gunāhoñ kī hayā se 'ājiz'

muñh chhupā.e hue ghuñghaT meñ kafan ke nikle

hausle kyon na dil-e-charKH-e-kuhan ke nikle

misl-e-yusuf na phire jo hain watan ke nikle

mar-miTe jo teri ulfat mein wo aazad hue

jite ji bande se wo ranj-o-mehan ke nikle

main to KHush ho ke ewaz is ke duaen dunga

munh se dushnam jo us ghuncha-dahan ke nikle

galiyan de ke to kar pyar se baaten ai shoKH

hum to shaida tere andaz-e-suKHan ke nikle

sarfaroshon ko KHabar do sar-e-maqtal aaen

hath mein tegh liye aaj wo tan ke nikle

sarw-o-shamshad o sanobar jo khaDe hain lab-e-ju

alam-e-sabz hain matam mein hasan ke nikle

ghar se hum apne gunahon ki haya se 'ajiz'

munh chhupae hue ghunghaT mein kafan ke nikle