hausle mayus zauq-e-justuju nakaam hai

hausle māyūs zauq-e-justujū nākām hai

ye dil-e-nā-mahram-e-anjām kā anjām hai

aañkh kyā hai husn kī rañgīniyoñ kā aa.ina

dil hai kyā ḳhūn-e-tamannā kā chhalaktā jaam hai

dījiye bīmār-e-ulfat kī jigar-dārī kī daad

naza.a kā aalam hai hoñToñ par tumhārā naam hai

phir vo yaad aa.e huī mad.hosh dil kī kā.enāt

phir uThā dard-e-jigar phir kuchh mujhe ārām hai

ḳhāk-dān-e-dahr meñ taskīn kā juuyā na ho

aah jab tak dil dhaḌaktā hai kahāñ ārām hai

vo to dil meñ dard kī duniyā basā kar chal diye

mujh ko har tār-e-nafas ik maut kā paiġhām hai

vāsil-e-mizrāb-e-ḳhāmoshī hai har tār-e-nafas

us se kah do ab tire bīmār ko ārām hai

kar rahā huuñ dostoñ ke zo.am par tark-e-vatan

shāyad ab āġhāz-e-daur-e-gardish-e-ayyām hai

hausle mayus zauq-e-justuju nakaam hai

ye dil-e-na-mahram-e-anjam ka anjam hai

aankh kya hai husn ki ranginiyon ka aaina

dil hai kya KHun-e-tamanna ka chhalakta jam hai

dijiye bimar-e-ulfat ki jigar-dari ki dad

naza ka aalam hai honTon par tumhaara nam hai

phir wo yaad aae hui madhosh dil ki kaenat

phir uTha dard-e-jigar phir kuchh mujhe aaram hai

KHak-dan-e-dahr mein taskin ka juya na ho

aah jab tak dil dhaDakta hai kahan aaram hai

wo to dil mein dard ki duniya basa kar chal diye

mujh ko har tar-e-nafas ek maut ka paigham hai

wasil-e-mizrab-e-KHamoshi hai har tar-e-nafas

us se kah do ab tere bimar ko aaram hai

kar raha hun doston ke zoam par tark-e-watan

shayad ab aaghaz-e-daur-e-gardish-e-ayyam hai