hawa chali hai ye kaisi KHilaf chaaron taraf

havā chalī hai ye kaisī ḳhilāf chāroñ taraf

hai ek silsila-e-inhirāf chāroñ taraf

haqīqatoñ kī bhī pahchān ab huī dushvār

ḳhazaf ḳhazaf haiñ sadaf ke ḳhilāf chāroñ taraf

isī tarah hai abhī bātinoñ meñ sannāTā

hai apnī zaat kā go inkishāf chāroñ taraf

tū sang-e-mīl kī sūrat hai nasb ek jagah

maiñ gard-e-rāh huuñ merā tavāf chāroñ taraf

hai chehra chehra vahī zaḳhm-e-rā.egāñ-hunarī

bikhar ga.e haiñ qalam ke shigāf chāroñ taraf

haiñ raushnā.ī-o-qirtās-o-kilk bhī kyā kuchh

mile varaq-ba-varaq iḳhtilāf chāroñ taraf

tū ḳhud se kaT ke zarā dūsroñ meñ jiinā siikh

kareñge log tirā e'tirāf chāroñ taraf

rahūñ hisār-e-badan meñ ki shahr-e-jāñ ko chalūñ

vahī tavāf vahī etakāf chāroñ taraf

'fazā' muravvaja bahroñ meñ jiddatoñ kā ye shauq

izāfe simTe to phaile zihāf chāroñ taraf

hawa chali hai ye kaisi KHilaf chaaron taraf

hai ek silsila-e-inhiraf chaaron taraf

haqiqaton ki bhi pahchan ab hui dushwar

KHazaf KHazaf hain sadaf ke KHilaf chaaron taraf

isi tarah hai abhi baatinon mein sannaTa

hai apni zat ka go inkishaf chaaron taraf

tu sang-e-mil ki surat hai nasb ek jagah

main gard-e-rah hun mera tawaf chaaron taraf

hai chehra chehra wahi zaKHm-e-raegan-hunari

bikhar gae hain qalam ke shigaf chaaron taraf

hain raushnai-o-qirtas-o-kilk bhi kya kuchh

mile waraq-ba-waraq iKHtilaf chaaron taraf

tu KHud se kaT ke zara dusron mein jina sikh

karenge log tera e'tiraf chaaron taraf

rahun hisar-e-badan mein ki shahr-e-jaan ko chalun

wahi tawaf wahi etakaf chaaron taraf

'faza' murawwaja bahron mein jiddaton ka ye shauq

izafe simTe to phaile zihaf chaaron taraf