hawa-e-tez ke aage kahan rahega koi

havā-e-tez ke aage kahāñ rahegā koī

diye pe vaqt sadā mehrbāñ rahegā koī

ai dost ham bhī zamīñ par dhueñ kī sūrat haiñ

fazā meñ kitnā dhuāñ hai dhuāñ rahegā koī

ajiib naqsh banā.e haiñ vahshat-e-dil ne

magar ye ret hai is par nishāñ rahegā koī

makān-e-dil kī sabhī raunaqeñ makīnoñ se

makīn hī na rahe to makāñ rahegā koī

surāġh lā.egī kitne na.e jahānoñ kā

ye āgahī kā safar rā.egāñ rahegā koī

jo dil kī jhiil hī jazboñ se ho ga.ī ḳhālī

to apnī aañkh meñ āb-e-ravāñ rahegā koī

ham apne saath hī le jā.eñge jahāñ apnā

hamāre ba.ad to yūñhī jahāñ rahegā koī

hawa-e-tez ke aage kahan rahega koi

diye pe waqt sada mehrban rahega koi

ai dost hum bhi zamin par dhuen ki surat hain

faza mein kitna dhuan hai dhuan rahega koi

ajib naqsh banae hain wahshat-e-dil ne

magar ye ret hai is par nishan rahega koi

makan-e-dil ki sabhi raunaqen makinon se

makin hi na rahe to makan rahega koi

suragh laegi kitne nae jahanon ka

ye aagahi ka safar raegan rahega koi

jo dil ki jhil hi jazbon se ho gai KHali

to apni aankh mein aab-e-rawan rahega koi

hum apne sath hi le jaenge jahan apna

hamare baad to yunhi jahan rahega koi