hawa ka jhonka bhi nazren jama ke baiTh gaya

havā kā jhoñkā bhī nazreñ jamā ke baiTh gayā

maiñ ret par tirā chehra banā ke baiTh gayā

sarāpā-nāz vo mahfil meñ aa ke baiTh gayā

na jaane kitnoñ ke tote uḌā ke baiTh gayā

thā intizār mujhe jis ke lauT aane kā

kisī ko aur vo apnā banā ke baiTh gayā

bhaTak rahī thī havā kāsa-e-talab le kar

so rāste meñ diyā maiñ jalā ke baiTh gayā

vo ek bulbula jo sat.h-e-āb par ubhrā

bisāt merī vo mujh ko batā ke baiTh gayā

kuredne se na baaz aayā raakh maazī kī

vo āḳhir uñgliyāñ apnī jalā ke baiTh gayā

malāl-o-rashk hai 'jīrājpūrī' ko us kā

'niyāz' se bhī koī dil lagā ke baiTh gayā

hawa ka jhonka bhi nazren jama ke baiTh gaya

main ret par tera chehra bana ke baiTh gaya

sarapa-naz wo mahfil mein aa ke baiTh gaya

na jaane kitnon ke tote uDa ke baiTh gaya

tha intizar mujhe jis ke lauT aane ka

kisi ko aur wo apna bana ke baiTh gaya

bhaTak rahi thi hawa kasa-e-talab le kar

so raste mein diya main jala ke baiTh gaya

wo ek bulbula jo sath-e-ab par ubhra

bisat meri wo mujh ko bata ke baiTh gaya

kuredne se na baz aaya rakh mazi ki

wo aaKHir ungliyan apni jala ke baiTh gaya

malal-o-rashk hai 'jirajpuri' ko us ka

'niyaz' se bhi koi dil laga ke baiTh gaya