hawa ke zor se pindar-e-baam-o-dar bhi gaya

havā ke zor se pindār-e-bām-o-dar bhī gayā

charāġh ko jo bachāte the un kā ghar bhī gayā

pukārte rahe mahfūz kashtiyoñ vaale

maiñ Dūbtā huā dariyā ke paar utar bhī gayā

ab ehtiyāt kī dīvār kyā uThāte ho

jo chor dil meñ chhupā thā vo kaam kar bhī gayā

maiñ chup rahā ki isī meñ thī āfiyat jaañ kī

koī to merī tarah thā jo daar par bhī gayā

sulagte sochte vīrān mausamoñ kī tarah

kaḌā thā ahd-e-javānī magar guzar bhī gayā

jise bhulā na sakā us ko yaad kyā rakhtā

jo naam lab pe rahā zehn se utar bhī gayā

phaTī phaTī huī āñkhoñ se yuuñ na dekh mujhe

tujhe talāsh hai jis shaḳhs kī vo mar bhī gayā

magar falak ko adāvat usī ke ghar se thī

jahāñ 'farāz' na thā sail-e-ġham udhar bhī gayā

hawa ke zor se pindar-e-baam-o-dar bhi gaya

charagh ko jo bachate the un ka ghar bhi gaya

pukarte rahe mahfuz kashtiyon wale

main Dubta hua dariya ke par utar bhi gaya

ab ehtiyat ki diwar kya uThate ho

jo chor dil mein chhupa tha wo kaam kar bhi gaya

main chup raha ki isi mein thi aafiyat jaan ki

koi to meri tarah tha jo dar par bhi gaya

sulagte sochte viran mausamon ki tarah

kaDa tha ahd-e-jawani magar guzar bhi gaya

jise bhula na saka us ko yaad kya rakhta

jo nam lab pe raha zehn se utar bhi gaya

phaTi phaTi hui aankhon se yun na dekh mujhe

tujhe talash hai jis shaKHs ki wo mar bhi gaya

magar falak ko adawat usi ke ghar se thi

jahan 'faraaz' na tha sail-e-gham udhar bhi gaya