hawa ki tarh main jis aag ke hisar mein tha

havā kī tarh maiñ jis aag ke hisār meñ thā

mirā nasīb usī halqa-e-sharār meñ thā

jo sang us ne uThāyā thā mere sar ke liye

vo kab gulāb banegā maiñ intizār meñ thā

banā rahā thā vo kal hī to aise mansūbe

ki jaise nazm-e-jahāñ us ke iḳhtiyār meñ thā

khulā jo us kā tilism-e-badan mire dil par

mujhe lagā ki maiñ rangoñ ke ābshār meñ thā

milā thā mujh se vo aġhyār ke vasīle se

vo be-ḳhabar thā ki maiñ us ke iḳhtiyār meñ thā

koī charāġh thā raushan ki us kā rū-e-jamīl

har ek samt ujālā sā rahguzār meñ thā

jo ek sang se kitne hī phal girā detā

vo shaḳhs tez havāoñ ke intizār meñ thā

balā.eñ lauT ga.iiñ dekh kar 'bashīr' mujhe

ki maiñ to sūra-e-yāsīn ke hisār meñ thā

hawa ki tarh main jis aag ke hisar mein tha

mera nasib usi halqa-e-sharar mein tha

jo sang us ne uThaya tha mere sar ke liye

wo kab gulab banega main intizar mein tha

bana raha tha wo kal hi to aise mansube

ki jaise nazm-e-jahan us ke iKHtiyar mein tha

khula jo us ka tilism-e-badan mere dil par

mujhe laga ki main rangon ke aabshaar mein tha

mila tha mujh se wo aghyar ke wasile se

wo be-KHabar tha ki main us ke iKHtiyar mein tha

koi charagh tha raushan ki us ka ru-e-jamil

har ek samt ujala sa rahguzar mein tha

jo ek sang se kitne hi phal gira deta

wo shaKHs tez hawaon ke intizar mein tha

balaen lauT gain dekh kar 'bashir' mujhe

ki main to sura-e-yasin ke hisar mein tha