hawa mein tez-rawi hai na josh pani mein

havā meñ tez-ravī hai na josh paanī meñ

sukūt-e-marg hai sailāb kī ravānī meñ

na koī baat na jhagḌā na mudda.ā koī

jhulas rahā hai mirā shahr bad-gumānī meñ

bilā-sabab nahīñ sharh-e-hayāt kī surḳhī

jigar kā ḳhuun bhī shāmil hai tarjumānī meñ

huī tamām chalo zahmat-e-ḳharīdārī

balā kā lutf hai is daur kī girānī meñ

huā faqīr to sidra pe aa gayā āḳhir

bhaTak ga.e the qadam jis ke hukmrānī meñ

ba-vaqt-e-naza.a nazar aa rahā hai vo ma.abūd

jo ham ko yaad na aayā bharī javānī meñ

'majāz' jis kī satā.ish meñ sher kahtā huuñ

bas ek vo hī nahīñ hai mirī kahānī meñ

hawa mein tez-rawi hai na josh pani mein

sukut-e-marg hai sailab ki rawani mein

na koi baat na jhagDa na muddaa koi

jhulas raha hai mera shahr bad-gumani mein

bila-sabab nahin sharh-e-hayat ki surKHi

jigar ka KHun bhi shamil hai tarjumani mein

hui tamam chalo zahmat-e-KHaridari

bala ka lutf hai is daur ki girani mein

hua faqir to sidra pe aa gaya aaKHir

bhaTak gae the qadam jis ke hukmrani mein

ba-waqt-e-naza nazar aa raha hai wo mabud

jo hum ko yaad na aaya bhari jawani mein

'majaz' jis ki sataish mein sher kahta hun

bas ek wo hi nahin hai meri kahani mein