hawa na-sazgar-e-gulsitan malum hoti hai

havā nā-sāzgār-e-gulsitāñ ma.alūm hotī hai

agar hañstī bhī haiñ kaliyāñ fuġhāñ ma.alūm hotī haiñ

ḳhushī meñ apnī ḳhush-baḳhtī kahāñ ma.alūm hotī hai

qafas meñ jā ke qadr-e-āshiyāñ ma.alūm hotī hai

har ik ke zarf kī vus.at yahāñ ma.alūm hotī hai

mohabbat aadmī kā imtihāñ ma.alūm hotī hai

kabhī shāyad mohabbat kā koī hāsil nikal aa.e

abhī to rā.egāñ hī rā.egāñ ma.alūm hotī hai

ye dil ko kar diyā kaisā kisī kī kam-nigāhī ne

zarā sī phāñs chubhtī hai sināñ ma.alūm hotī hai

khiñch aatī haiñ isī sāhil pe ḳhud do ajnabī maujeñ

mohabbat ek jazb-e-be-amāñ ma.alūm hotī hai

ufuq hī par abhī tak haiñ tasavvur kī hasīñ shāmeñ

kahīñ Thahrī huī umr-e-ravāñ ma.alūm hotī haiñ

tum is hālat ko kyā jaano na jaano hī to achchhā hai

hañsī jab aa ke hoñToñ par fuġhāñ ma.alūm hotī hai

tirī be-mehriyāñ āḳhir vo nāzuk vaqt le aa.eñ

ki apnoñ kī mohabbat bhī garāñ ma.alūm hotī hai

nazar aatā nahīñ shabnam kā girnā phuul kā khilnā

mohabbat kī haqīqat nā-gahāñ ma.alūm hotī hai

chaman kā dard hai jis dil meñ to chāhe kahīñ uTThe

use apnī hī shāḳh-e-āshiyāñ ma.alūm hotī hai

nazar phirtī thī vo pahle bhī lekin yuuñ na phirtī thī

kuchh ab kī ḳhatm hotī dāstāñ ma.alūm hotī hai

abhī ḳhākistar-e-'mullā' se uThtā hai dhuāñ kuchh kuchh

kahīñ par koī chiñgārī tapāñ ma.alūm hotī hai

hawa na-sazgar-e-gulsitan malum hoti hai

agar hansti bhi hain kaliyan fughan malum hoti hain

KHushi mein apni KHush-baKHti kahan malum hoti hai

qafas mein ja ke qadr-e-ashiyan malum hoti hai

har ek ke zarf ki wusat yahan malum hoti hai

mohabbat aadmi ka imtihan malum hoti hai

kabhi shayad mohabbat ka koi hasil nikal aae

abhi to raegan hi raegan malum hoti hai

ye dil ko kar diya kaisa kisi ki kam-nigahi ne

zara si phans chubhti hai sinan malum hoti hai

khinch aati hain isi sahil pe KHud do ajnabi maujen

mohabbat ek jazb-e-be-aman malum hoti hai

ufuq hi par abhi tak hain tasawwur ki hasin shamen

kahin Thahri hui umr-e-rawan malum hoti hain

tum is haalat ko kya jaano na jaano hi to achchha hai

hansi jab aa ke honTon par fughan malum hoti hai

teri be-mehriyan aaKHir wo nazuk waqt le aaen

ki apnon ki mohabbat bhi garan malum hoti hai

nazar aata nahin shabnam ka girna phul ka khilna

mohabbat ki haqiqat na-gahan malum hoti hai

chaman ka dard hai jis dil mein to chahe kahin uTThe

use apni hi shaKH-e-ashiyan malum hoti hai

nazar phirti thi wo pahle bhi lekin yun na phirti thi

kuchh ab ki KHatm hoti dastan malum hoti hai

abhi KHakistar-e-'mulla' se uThta hai dhuan kuchh kuchh

kahin par koi chingari tapan malum hoti hai