hawa ne ye kiya ehsan ki ja kar un ke aiwan mein

havā ne ye kiyā ehsāñ ki jā kar un ke aivāñ meñ

mirā rang-e-parīda bhar diyā tasvīr-e-jānāñ meñ

bagūle haiñ na sahrā hai na saa.eñ saa.eñ āvāzeñ

lagegā jī hamārā kis tarah se bāġh-e-rizvāñ meñ

unhīñ kī yaad jannat meñ bhī taḌpāne lagī dil ko

na dekhī jab adā.eñ un ke aisī hūr-o-ġhilmāñ meñ

bagūle haiñ faqat ik mūnis-e-tanhā.ī sahrā meñ

inhīñ ke saath meñ har samt phirtā huuñ bayābāñ meñ

nazar lagne kā un ke vāste ganDā banāne ko

bachā rakkhe haiñ maiñ ne taar kuchh apne garebāñ meñ

junūn-e-'ishq thā maḳhsūs mujh se baa'd majnūñ ke

na aayā baa'd mere koī dīvāna bayābāñ meñ

mah-o-mā'shūq ho abr-e-bahārāñ ho gulistāñ ho

isī kā naam jannat hai nigāh-e-hosh-mandāñ meñ

nasīhat ke bahāne se janāb-e-shaiḳh aa.e haiñ

nazāra kar rahe haiñ baiTh kar bazm-e-hasīnāñ meñ

hawa ne ye kiya ehsan ki ja kar un ke aiwan mein

mera rang-e-parida bhar diya taswir-e-jaanan mein

bagule hain na sahra hai na saen saen aawazen

lagega ji hamara kis tarah se bagh-e-rizwan mein

unhin ki yaad jannat mein bhi taDpane lagi dil ko

na dekhi jab adaen un ke aisi hur-o-ghilman mein

bagule hain faqat ek munis-e-tanhai sahra mein

inhin ke sath mein har samt phirta hun bayaban mein

nazar lagne ka un ke waste ganDa banane ko

bacha rakkhe hain main ne tar kuchh apne gareban mein

junun-e-'ishq tha maKHsus mujh se ba'd majnun ke

na aaya ba'd mere koi diwana bayaban mein

mah-o-ma'shuq ho abr-e-bahaaran ho gulistan ho

isi ka nam jannat hai nigah-e-hosh-mandan mein

nasihat ke bahane se janab-e-shaiKH aae hain

nazara kar rahe hain baiTh kar bazm-e-hasinan mein