hawa se baada nichoDen kali ko jam karen

havā se baada nichoḌeñ kalī ko jaam kareñ

sukūt-e-rañg-e-chaman se zarā kalām kareñ

hameñ to koī bhī pahchāntā nahīñ hai yahāñ

nigāh kis se milā.eñ kise salām kareñ

zamāna is pe tulā hai ḳhirad kī baat rahe

hameñ ye zid hai ki ūñchā junūñ kā naam kareñ

fazā hai gosh-bar-āvāz chup haiñ ahl-e-navā

ab is adhūrī kahānī ko ham tamām kareñ

tumhāre jaam ko pahle nazar se chhalkā deñ

phir apne hosh meñ aa kar tavāf-e-jām kareñ

kisī ġhazāl meñ bhī ab nahīñ ram-e-vahshat

ham apne sehr-e-tamannā se kis ko raam kareñ

ḳhulūs-e-dil kā sila soz aarzū kā guhar

isī guhar 'farīdī' charāġh-e-shām kareñ

hawa se baada nichoDen kali ko jam karen

sukut-e-rang-e-chaman se zara kalam karen

hamein to koi bhi pahchanta nahin hai yahan

nigah kis se milaen kise salam karen

zamana is pe tula hai KHirad ki baat rahe

hamein ye zid hai ki uncha junun ka nam karen

faza hai gosh-bar-awaz chup hain ahl-e-nawa

ab is adhuri kahani ko hum tamam karen

tumhaare jam ko pahle nazar se chhalka den

phir apne hosh mein aa kar tawaf-e-jam karen

kisi ghazal mein bhi ab nahin ram-e-wahshat

hum apne sehr-e-tamanna se kis ko ram karen

KHulus-e-dil ka sila soz aarzu ka guhar

isi guhar 'faridi' charagh-e-sham karen