hawa se baat karenge ya hausla karenge

havā se baat kareñge yā hausla kareñge

charāġh aisī fazāoñ meñ aur kyā kareñge

nayā makān khañDar kar liyā sajāte hue

ab aise log tamāshe meñ kyā nayā kareñge

bahut girāyā hai takiye kī 'ādatoñ ne hameñ

so agle ḳhvāb meñ bistar kā aasrā kareñge

tumhāre saath ta'alluq banā.eñge gahrā

zarā sī baat pe haftoñ bhī laḌ liyā kareñge

ham ab kī baar buzurgoñ kā maan rakkheñge

samajh ke soch ke har tajraba kiyā kareñge

bas ek baar hameñ dostī meñ shāmil kar

kareñge terī taraf-dārī bā-ḳhudā kareñge

bichhaḌte vaqt bhī amn-o-amāñ banā rahegā

salām bhejeñge harf-e-du'ā kiyā kareñge

hawa se baat karenge ya hausla karenge

charagh aisi fazaon mein aur kya karenge

naya makan khanDar kar liya sajate hue

ab aise log tamashe mein kya naya karenge

bahut giraya hai takiye ki 'adaton ne hamein

so agle KHwab mein bistar ka aasra karenge

tumhaare sath ta'alluq banaenge gahra

zara si baat pe hafton bhi laD liya karenge

hum ab ki bar buzurgon ka man rakkhenge

samajh ke soch ke har tajraba kiya karenge

bas ek bar hamein dosti mein shamil kar

karenge teri taraf-dari ba-KHuda karenge

bichhaDte waqt bhi amn-o-aman bana rahega

salam bhejenge harf-e-du'a kiya karenge