hawa se dast-o-gareban hua to bhed khula

havā se dast-o-garebāñ huā to bhed khulā

maiñ ḳhud diye kī jagah par jalā to bhed khulā

ham apne naqsh bhī kho baiThe us hasīñ ke liye

hamāre haath lagā ā.īna to bhed khulā

mujhe ḳhabar hī na thī ġham bhī haiñ zamāne meñ

jab āsmāñ mire sar par girā to bhed khulā

maiñ chīḳhtā hī rahā be-asar sadā.eñ diiñ

kisī taraf na milā jab ḳhudā to bhed khulā

kisī ne haath baḌhāyā na koī paas aayā

rah-e-vafā pe maiñ thak kar girā to bhed khulā

ye hādse mujhe patthar samajh rahe the 'adīl'

phir ek roz maiñ jab ro paḌā to bhed khulā

hawa se dast-o-gareban hua to bhed khula

main KHud diye ki jagah par jala to bhed khula

hum apne naqsh bhi kho baiThe us hasin ke liye

hamare hath laga aaina to bhed khula

mujhe KHabar hi na thi gham bhi hain zamane mein

jab aasman mere sar par gira to bhed khula

main chiKHta hi raha be-asar sadaen din

kisi taraf na mila jab KHuda to bhed khula

kisi ne hath baDhaya na koi pas aaya

rah-e-wafa pe main thak kar gira to bhed khula

ye hadse mujhe patthar samajh rahe the 'adil'

phir ek roz main jab ro paDa to bhed khula