hawa zamane ki saqi badal to sakti hai

havā zamāne kī saaqī badal to saktī hai

hayāt sāġhar-e-rañgīñ meñ Dhal to saktī hai

bas ik latīf tabassum bas ik hasīn nazar

marīz-e-dil kī ye hālat sambhal to saktī hai

jahāñ se chhoḌ rahe ho mujhe añdhere meñ

vahīñ se rāh-e-mohabbat nikal to saktī hai

phir apne ġhuncha-e-zaḳhm-e-jigar kā kyā hogā

nasīm-e-sub.h mirī samt chal to saktī hai

tirī nigāh-e-karam kī qasam hai ab bhī mujhe

yahī yaqīn ki duniyā badal to saktī hai

'salām' jām-o-subū kī ye shā.irī ma.alūm

vagarna apnī tabī.at bahal to saktī hai

hawa zamane ki saqi badal to sakti hai

hayat saghar-e-rangin mein Dhal to sakti hai

bas ek latif tabassum bas ek hasin nazar

mariz-e-dil ki ye haalat sambhal to sakti hai

jahan se chhoD rahe ho mujhe andhere mein

wahin se rah-e-mohabbat nikal to sakti hai

phir apne ghuncha-e-zaKHm-e-jigar ka kya hoga

nasim-e-subh meri samt chal to sakti hai

teri nigah-e-karam ki qasam hai ab bhi mujhe

yahi yaqin ki duniya badal to sakti hai

'salam' jam-o-subu ki ye shairi malum

wagarna apni tabiat bahal to sakti hai