hawas khoi hui KHud se be-KHabar Thahri

havās khoī huī ḳhud se be-ḳhabar Thahrī

nazar jidhar bhī ga.ī der tak udhar Thahrī

junūñ ke rū-ba-rū koī na tājvar Thahrā

hamāre paañv kī zanjīr mo'atabar Thahrī

hamāre sāmne thā taḳht-o-tāj kā aalam

nazar hamārī magar jā ke daar par Thahrī

gayā na maiñ kisī sūrat panāh meñ us kī

vo chhāñv mere liye der tak magar Thahrī

ye dhuup jis ko kahīñ shahr meñ amaañ na milī

to be-jhijhak ye mire ghar ke baam par Thahrī

na jaane kaun use de gayā ġham-e-furqat

falak pe chāñdnī be-sūd raat bhar Thahrī

ġhazal udaas bahut jaane aas meñ kis kī

lagā ke Tek darīche se umr bhar Thahrī

hawas khoi hui KHud se be-KHabar Thahri

nazar jidhar bhi gai der tak udhar Thahri

junun ke ru-ba-ru koi na tajwar Thahra

hamare panw ki zanjir mo'atabar Thahri

hamare samne tha taKHt-o-taj ka aalam

nazar hamari magar ja ke dar par Thahri

gaya na main kisi surat panah mein us ki

wo chhanw mere liye der tak magar Thahri

ye dhup jis ko kahin shahr mein aman na mili

to be-jhijhak ye mere ghar ke baam par Thahri

na jaane kaun use de gaya gham-e-furqat

falak pe chandni be-sud raat bhar Thahri

ghazal udas bahut jaane aas mein kis ki

laga ke Tek dariche se umr bhar Thahri