hawas-parasti o ghaarat-gari ki lat na gai

havas-parastī o ġhārat-garī kī lat na ga.ī

yazīd mar gayā lekin yazīdiyat na ga.ī

ghirā rahā maiñ ajab kashmakash ke aalam meñ

ki jab talak mire sāñsoñ kī suut kat na ga.ī

ḳhirad kī aag meñ sadiyoñ jale badan lekin

dil-o-dimāġh se bū-e-munāfirat na ga.ī

hayāt o maut ke har inqalāb se guzre

hamāre sar se magar āsmāñ kī chhat na ga.ī

jatan hazār kiye marg-e-nā-gahānī ne

magar hayāt kī hargiz chalat-phirat na ga.ī

tilism-e-lafz-o-ma.ānī meñ qaid huuñ 'shādāb'

tamām umr mire haath se luġhat na ga.ī

hawas-parasti o ghaarat-gari ki lat na gai

yazid mar gaya lekin yazidiyat na gai

ghira raha main ajab kashmakash ke aalam mein

ki jab talak mere sanson ki sut kat na gai

KHirad ki aag mein sadiyon jale badan lekin

dil-o-dimagh se bu-e-munafirat na gai

hayat o maut ke har inqalab se guzre

hamare sar se magar aasman ki chhat na gai

jatan hazar kiye marg-e-na-gahani ne

magar hayat ki hargiz chalat-phirat na gai

tilism-e-lafz-o-maani mein qaid hun 'shadab'

tamam umr mere hath se lughat na gai