haya ki ek hasin chadar agar tani nahin hoti

hayā kī ik hasīñ chādar agar taanī nahīñ hotī

tumhārī sub.h raushan raat nūrānī nahīñ hotī

unheñ hargiz nahīñ miltī kabhī bhī ishq kī daulat

vo jin se zindagī meñ dost nādānī nahīñ hotī

hamārī laaj rakh lī zindagī kī bhuul ne varna

hamārī ishq kī duniyā meñ sultānī nahīñ hotī

diloñ ko toḌne vaalo baḌhā kar dūriyāñ dekho

mohabbat fāsle rakh kar bhī begānī nahīñ hotī

mohabbat kis galī meñ raqs kartī kis pe itrātī

agar lailā kisī majnūñ kī dīvānī nahīñ hotī

qadam tapte hue sahrāoñ pe rakkhā hai majnūñ ne

tabhī to ishq kī duniyā meñ vīrānī nahīñ hotī

kahāñ se akbar-e-āzam ke gulshan meñ bahār aatī

agar chunarī vo jodhā.bā.ī kī dhānī nahīñ hotī

furūī ishq ne 'maqsūd' rusvā kar diyā hotā

buzurgoñ kī nasīhat tū ne jo maanī nahīñ hotī

haya ki ek hasin chadar agar tani nahin hoti

tumhaari subh raushan raat nurani nahin hoti

unhen hargiz nahin milti kabhi bhi ishq ki daulat

wo jin se zindagi mein dost nadani nahin hoti

hamari laj rakh li zindagi ki bhul ne warna

hamari ishq ki duniya mein sultani nahin hoti

dilon ko toDne walo baDha kar duriyan dekho

mohabbat fasle rakh kar bhi begani nahin hoti

mohabbat kis gali mein raqs karti kis pe itraati

agar laila kisi majnun ki diwani nahin hoti

qadam tapte hue sahraon pe rakkha hai majnun ne

tabhi to ishq ki duniya mein virani nahin hoti

kahan se akbar-e-azam ke gulshan mein bahaar aati

agar chunari wo jodhabai ki dhani nahin hoti

furui ishq ne 'maqsud' ruswa kar diya hota

buzurgon ki nasihat tu ne jo mani nahin hoti