hayat dauDti hai umr bhar qaza ki taraf

hayāt dauḌtī hai umr bhar qazā kī taraf

jazā-e-ḳhair kī jānib ki phir sazā kī taraf

maqām-e-fikr hai ye samt-e-fikr Thiik nahīñ

safar hai tez magar hai kahāñ ḳhudā kī taraf

rahe miyāna-ravī hai yahī tarīqa-e-adl

jhukeñ na sifr kī jānib na intihā kī taraf

na jaane kaisā hai ye irtiqā zamāne kā

ki lauT lauT ke jaatā hai ibtidā kī taraf

ye kaisī jā hai jahāñ hai havā bhī masnūī

nikal ke bhaag chalo qudratī fazā kī taraf

maraz shifā kī taḌap meñ qadam uThātā hai

kabhī davā kī taraf aur kabhī duā kī taraf

pukārnā hai tirā kaam kaam kar 'jāved'

palaT ke aa.egī duniyā tirī sadā kī taraf

hayat dauDti hai umr bhar qaza ki taraf

jaza-e-KHair ki jaanib ki phir saza ki taraf

maqam-e-fikr hai ye samt-e-fikr Thik nahin

safar hai tez magar hai kahan KHuda ki taraf

rahe miyana-rawi hai yahi tariqa-e-adl

jhuken na sifr ki jaanib na intiha ki taraf

na jaane kaisa hai ye irtiqa zamane ka

ki lauT lauT ke jata hai ibtida ki taraf

ye kaisi ja hai jahan hai hawa bhi masnui

nikal ke bhag chalo qudrati faza ki taraf

maraz shifa ki taDap mein qadam uThata hai

kabhi dawa ki taraf aur kabhi dua ki taraf

pukarna hai tera kaam kaam kar 'jawed'

palaT ke aaegi duniya teri sada ki taraf