hazar aarzu ho tum yaqin ho tum guman ho tum

hazār aarzū ho tum yaqīñ ho tum gumāñ ho tum

qafas-nasīb ruuh kī umīd-e-āshiyāñ ho tum

diloñ ko aa ke dekh lo yaqīñ nahīñ gumāñ ho tum

lab-e-fasāna-sāz par barā.e-dāstāñ ho tum

ġhubār ban ke aarzū ravāñ-davāñ hai kū-bakū

kahīñ se kuchh sadā to do kahāñ ho tum kahāñ ho tum

rah-e-darāz-e-zindagī meñ rahravoñ kī ḳhair ho

ki naaqa bad-qadam hai aur sharīr sārbāñ ho tum

jabīñ ne khīñch to liyā tumheñ zamīr-e-sang se

hujūm-e-sajda kī qasam magar abhī nihāñ ho tum

zabāñ gul-o-giyāh kī hai shikva-sanj-e-be-dilī

yahī tumhārā baaġh hai isī ke bāġhbāñ ho tum

ba-har-fusūñ tumheñ bas ik mazāq-e-dāstāñ-girī

kahīñ dil-e-jaras ho tum kahīñ lab-e-azāñ ho tum

na ḳhatt-e-jāda-e-qadam na sham.a-e-manzil-e-nazar

abhī to kārvāñ ko ek hū-e-kārvāñ ho tum

hazar aarzu ho tum yaqin ho tum guman ho tum

qafas-nasib ruh ki umid-e-ashiyan ho tum

dilon ko aa ke dekh lo yaqin nahin guman ho tum

lab-e-fasana-saz par barae-dastan ho tum

ghubar ban ke aarzu rawan-dawan hai ku-baku

kahin se kuchh sada to do kahan ho tum kahan ho tum

rah-e-daraaz-e-zindagi mein rahrawon ki KHair ho

ki naqa bad-qadam hai aur sharir sarban ho tum

jabin ne khinch to liya tumhein zamir-e-sang se

hujum-e-sajda ki qasam magar abhi nihan ho tum

zaban gul-o-giyah ki hai shikwa-sanj-e-be-dili

yahi tumhaara bagh hai isi ke baghban ho tum

ba-har-fusun tumhein bas ek mazaq-e-dastan-giri

kahin dil-e-jaras ho tum kahin lab-e-azan ho tum

na KHatt-e-jada-e-qadam na shama-e-manzil-e-nazar

abhi to karwan ko ek hu-e-karwan ho tum