hazar qaid-e-jawan se chhuT kar bahaar ka aasra karenge

hazār qaid-e-javāñ se chhuT kar bahār kā aasrā kareñge

bahār bhī ham qafas-zadoñ ko na raas aa.ī to kyā kareñge

ab aur is ke sivā na hogī qafas meñ taskīn-e-dil kī sūrat

chaman kī jānib nazar uThā kar kabhī kabhī hañs liyā kareñge

ye kyā ḳhabar thī ki shām-e-furqat mire liye sāzgār hogī

vo māh-o-anjum kī aaḌ le kar mire fasāne sunā kareñge

nigāh kī bandisheñ salāmat junūñ kī pābandiyāñ musallam

kahīñ bharam khul gayā to ai dil maiñ kyā karūñgā vo kyā kareñge

ye dekhnā hai ki ba.ad-e-tark-e-ta.alluqāt ai 'shakīl' kab tak

na koī ham par jafā karegā na ham kisī se vafā kareñge

hazar qaid-e-jawan se chhuT kar bahaar ka aasra karenge

bahaar bhi hum qafas-zadon ko na ras aai to kya karenge

ab aur is ke siwa na hogi qafas mein taskin-e-dil ki surat

chaman ki jaanib nazar uTha kar kabhi kabhi hans liya karenge

ye kya KHabar thi ki sham-e-furqat mere liye sazgar hogi

wo mah-o-anjum ki aaD le kar mere fasane suna karenge

nigah ki bandishen salamat junun ki pabandiyan musallam

kahin bharam khul gaya to ai dil main kya karunga wo kya karenge

ye dekhna hai ki baad-e-tark-e-talluqat ai 'shakil' kab tak

na koi hum par jafa karega na hum kisi se wafa karenge