hazar rang jalal-o-jamal ke dekhe

hazār rang jalāl-o-jamāl ke dekhe

vo mārke tire husn-e-ḳhayāl ke dekhe

samajh meñ aane lagā maqsad-e-hayāt-o-mamāt

vo zāviye tire hijr o visāl ke dekhe

har ek ġham hai tar-o-tāza pahle din kī tarah

amānateñ koī yuuñ bhī sañbhāl ke dekhe

fazā na bujhne lage is ḳhayāl se aksar

dil o nigāh ke raste ujaal ke dekhe

nagar bhī aur khañDar bhī nazar meñ rahte haiñ

ajiib daur urūj-o-zavāl ke dekhe

ki rashk aane lagā apnī be-kamālī par

kamāl aise bhī ahl-e-kamāl ke dekhe

na chashm ishāre se vāqif na lab kā harf se rabt

kuchh aise silsile bhī qīl-o-qāl ke dekhe

zamīñ zamīñ na rahī aur falak falak na rahā

kuchh aise marhale bhī arz-e-hāl ke dekhe

koī sadī bhī hai pal aur koī pal bhī sadī

kuchh aise fāsle bhī māh-o-sāl ke dekhe

huī zamīn kabhī raakh to kabhī ġharqāb

kuchh aise hausle bhī barshgāl ke dekhe

ajiib shart hai in manzaroñ kī ai 'rūhī'

ki apnī āñkheñ koī ḳhud nikāl ke dekhe

hazar rang jalal-o-jamal ke dekhe

wo marke tere husn-e-KHayal ke dekhe

samajh mein aane laga maqsad-e-hayat-o-mamat

wo zawiye tere hijr o visal ke dekhe

har ek gham hai tar-o-taza pahle din ki tarah

amanaten koi yun bhi sanbhaal ke dekhe

faza na bujhne lage is KHayal se aksar

dil o nigah ke raste ujal ke dekhe

nagar bhi aur khanDar bhi nazar mein rahte hain

ajib daur uruj-o-zawal ke dekhe

ki rashk aane laga apni be-kamali par

kamal aise bhi ahl-e-kamal ke dekhe

na chashm ishaare se waqif na lab ka harf se rabt

kuchh aise silsile bhi qil-o-qal ke dekhe

zamin zamin na rahi aur falak falak na raha

kuchh aise marhale bhi arz-e-haal ke dekhe

koi sadi bhi hai pal aur koi pal bhi sadi

kuchh aise fasle bhi mah-o-sal ke dekhe

hui zamin kabhi rakh to kabhi gharqab

kuchh aise hausle bhi barshgal ke dekhe

ajib shart hai in manzaron ki ai 'ruhi'

ki apni aankhen koi KHud nikal ke dekhe