hazaron ranj mile sainkaDon malal mile

hazāroñ rañj mile saiñkaḌoñ malāl mile

ham apne aap se jab bhī mile niDhāl mile

har ek shaḳhs se milnā kahāñ munāsib thā

mile unhīñ se jahāñ dil mile ḳhayāl mile

vafā kī raah meñ kis par na tohmateñ aa.iiñ

koī to aisī zamāne meñ ik misāl mile

nahīñ hai tere jahāñ meñ koī bhī shai aisī

jise uruuj mile aur na phir zavāl mile

maiñ apne aap se bāhar nikal nahīñ paayā

jo tū milā to mujhe mere hāl-chāl mile

javāb DhūñDne niklā jo kal mirā maazī

laboñ pe haal ke is ko na.e savāl mile

mirī talāsh jahāñ jā ke ḳhatm ho 'sālim'

kahīñ to aisā koī sāhab-e-kamāl mile

hazaron ranj mile sainkaDon malal mile

hum apne aap se jab bhi mile niDhaal mile

har ek shaKHs se milna kahan munasib tha

mile unhin se jahan dil mile KHayal mile

wafa ki rah mein kis par na tohmaten aain

koi to aisi zamane mein ek misal mile

nahin hai tere jahan mein koi bhi shai aisi

jise uruj mile aur na phir zawal mile

main apne aap se bahar nikal nahin paya

jo tu mila to mujhe mere haal-chaal mile

jawab DhunDne nikla jo kal mera mazi

labon pe haal ke is ko nae sawal mile

meri talash jahan ja ke KHatm ho 'salim'

kahin to aisa koi sahab-e-kamal mile