hijab-e-husn mein ya husn-e-be-hijab mein hai

hijāb-e-husn meñ yā husn-e-be-hijāb meñ hai

ye raushnī kā safar aks-e-māhtāb meñ hai

yaqīñ gumāñ ho to manzil kī samt nā-ma.alūm

abhī safar kā irāda fusūn-e-ḳhvāb meñ hai

azāb-e-jāñ se mujh kis tarah najāt mile

ki merā naam abhī harf-e-ehtisāb meñ hai

milegā ajr kisī din jazā kī sūrat meñ

abhī sazā kā ḳhasāra mire hisāb meñ hai

hanūz dard kī lazzat se āshnā huuñ maiñ

sukūn mujh ko mayassar jo iztirāb meñ hai

havā bhī ab hai nigūñ-sār shāḳh-e-gul pe kahīñ

abhī to mauj bhī sāhil pe naqsh-e-āb meñ hai

maiñ apne ghar meñ huuñ lekin ye vahm hai dil meñ

mirā vajūd abhī dasht-e-be-sarāb meñ hai

mujhe bhī daulat-e-sher-o-suḳhan nasīb huī

ajiib husn atā us ke intiḳhāb meñ hai

ye qarz jaañ kā 'sabā' mujh se kab adā hogā

hunūz silsila-e-roz-o-shab hisāb meñ hai

hijab-e-husn mein ya husn-e-be-hijab mein hai

ye raushni ka safar aks-e-mahtab mein hai

yaqin guman ho to manzil ki samt na-malum

abhi safar ka irada fusun-e-KHwab mein hai

azab-e-jaan se mujh kis tarah najat mile

ki mera nam abhi harf-e-ehtisab mein hai

milega ajr kisi din jaza ki surat mein

abhi saza ka KHasara mere hisab mein hai

hanuz dard ki lazzat se aashna hun main

sukun mujh ko mayassar jo iztirab mein hai

hawa bhi ab hai nigun-sar shaKH-e-gul pe kahin

abhi to mauj bhi sahil pe naqsh-e-ab mein hai

main apne ghar mein hun lekin ye wahm hai dil mein

mera wajud abhi dasht-e-be-sarab mein hai

mujhe bhi daulat-e-sher-o-suKHan nasib hui

ajib husn ata us ke intiKHab mein hai

ye qarz jaan ka 'saba' mujh se kab ada hoga

hunuz silsila-e-roz-o-shab hisab mein hai