hijr ka qissa bahut lamba nahin bas raat bhar hai

hijr kā qissa bahut lambā nahīñ bas raat bhar hai

ek sannāTā magar chhāyā huā ehsās par hai

ik samundar be-hisī kā ek kashtī aarzū kī

haa.e kitnī muḳhtasar logoñ kī rūdād-e-safar hai

maiñ azal se chal rahā huuñ thak gayā huuñ sochtā huuñ

kyā tirī duniyā meñ har manzil nishān-e-rahguzar hai

is fasīl-e-ġham ko sar karne pe bhī kyā mil sakegā

ek dīvār-e-havā hai ek terā sañg-e-dar hai

Dūbne vaale sitāre ko bhalā kab tak pukāre

zindagī kī raat ko sūraj ke hañs dene kā Dar hai

dekh le mujh ko abhī kuchh raushnī baaqī hai mujh meñ

shaam tak ik ret kā tūfān aane kī ḳhabar hai

hijr ka qissa bahut lamba nahin bas raat bhar hai

ek sannaTa magar chhaya hua ehsas par hai

ek samundar be-hisi ka ek kashti aarzu ki

hae kitni muKHtasar logon ki rudad-e-safar hai

main azal se chal raha hun thak gaya hun sochta hun

kya teri duniya mein har manzil nishan-e-rahguzar hai

is fasil-e-gham ko sar karne pe bhi kya mil sakega

ek diwar-e-hawa hai ek tera sang-e-dar hai

Dubne wale sitare ko bhala kab tak pukare

zindagi ki raat ko suraj ke hans dene ka Dar hai

dekh le mujh ko abhi kuchh raushni baqi hai mujh mein

sham tak ek ret ka tufan aane ki KHabar hai