hijr ki rah kisi ke liye aasan nahin

hijr kī raah kisī ke liye āsān nahīñ

man' kartā huuñ to ho jaayā karo jaan nahīñ

ab maiñ chup-chāp yahī dekh rahā hotā huuñ

kaun is bazm meñ kis baat pe hairān nahīñ

us ko chhoḌā hai bahut soch samajh kar maiñ ne

so pareshān to rahtā huuñ pashemān nahīñ

shāyad achchhā hī kiyā an-sunī kar ke us ne

baat saada to bahut thī magar āsān nahīñ

kaam to aur bhī karne ko bahut haiñ lekin

she'r-goī ke 'alāva mire shāyān nahīñ

āḳhirī din haiñ mahīne ke tujhe kyā mā'lūm

tū samajhtā hai ki ik terī taraf dhyān nahīñ

ham yahāñ aur hī kuchh soch ke aa.e the magar

is ḳharābe meñ zarūrat kā bhī sāmān nahīñ

shai to achchhī hai miyāna-ravī lekin 'javvād'

us meñ kyā naf' hai jis meñ koī nuqsān nahīñ

hijr ki rah kisi ke liye aasan nahin

man' karta hun to ho jaya karo jaan nahin

ab main chup-chap yahi dekh raha hota hun

kaun is bazm mein kis baat pe hairan nahin

us ko chhoDa hai bahut soch samajh kar main ne

so pareshan to rahta hun pasheman nahin

shayad achchha hi kiya an-suni kar ke us ne

baat sada to bahut thi magar aasan nahin

kaam to aur bhi karne ko bahut hain lekin

she'r-goi ke 'alawa mere shayan nahin

aaKHiri din hain mahine ke tujhe kya ma'lum

tu samajhta hai ki ek teri taraf dhyan nahin

hum yahan aur hi kuchh soch ke aae the magar

is KHarabe mein zarurat ka bhi saman nahin

shai to achchhi hai miyana-rawi lekin 'jawwad'

us mein kya naf' hai jis mein koi nuqsan nahin