hijr ki raat hai virana hai tanhai hai

hijr kī raat hai vīrāna hai tanhā.ī hai

dil lagāne kī ajab ham ne sazā paa.ī hai

ik na.e azm na.e josh ko dekhā ham ne

tere āshiq meñ na.ī baat nazar aa.ī hai

mal ke hāthoñ pe merā ḳhūn-e-jigar kahne lage

rang kaisā mire hāthoñ pe hinā laa.ī hai

terī sohbat bhī mire nang kā baa.is hai samajh

mere milne se sanam gar tirī rusvā.ī hai

aur kyā is ke sivā hogī ibādat nāseh

yaar kā naqsh-e-kaf-e-pā hai jabīñ-sā.ī hai

mahfil-e-nāz kī ye saarī kashish hai 'nāzī'

varna taqdīr mujhe khīñch ke kyoñ laa.ī hai

hijr ki raat hai virana hai tanhai hai

dil lagane ki ajab hum ne saza pai hai

ek nae azm nae josh ko dekha hum ne

tere aashiq mein nai baat nazar aai hai

mal ke hathon pe mera KHun-e-jigar kahne lage

rang kaisa mere hathon pe hina lai hai

teri sohbat bhi mere nang ka bais hai samajh

mere milne se sanam gar teri ruswai hai

aur kya is ke siwa hogi ibaadat naseh

yar ka naqsh-e-kaf-e-pa hai jabin-sai hai

mahfil-e-naz ki ye sari kashish hai 'nazi'

warna taqdir mujhe khinch ke kyon lai hai