hijr ki sham se zaKHmon ke doshaale mangun

hijr kī shaam se zaḳhmoñ ke doshāle māñgūñ

maiñ siyāhī ke samundar se ujāle māñgūñ

jab na.ī nasl na.ī tarz se jiinā chāhe

kyuuñ na us ahd se dastūr nirāle māñgūñ

apne ehsās ke sahrā meñ taqaddus chāhūñ

apne jazbāt kī ghāTī meñ shivāle māñgūñ

apnī āñkhoñ ke liye dard ke aañsū DhūñDūñ

apne qadmoñ ke liye phuul se chhāle māñgūñ

har na.e moḌ pe chāhūñ na.e rishtoñ kā hujūm

har qadam par maiñ na.e chāhne vaale māñgūñ

apne ehsās kī shiddat ko bujhāne ke liye

maiñ na.ī tarz ke ḳhush-fikr risāle māñgoñ

din kī saḌkoñ pe sajā kar na.ī sub.heñ 'akmal'

shab kī chaukhaT ke liye āhanī taale māñgoñ

hijr ki sham se zaKHmon ke doshaale mangun

main siyahi ke samundar se ujale mangun

jab nai nasl nai tarz se jina chahe

kyun na us ahd se dastur nirale mangun

apne ehsas ke sahra mein taqaddus chahun

apne jazbaat ki ghaTi mein shiwale mangun

apni aankhon ke liye dard ke aansu DhunDun

apne qadmon ke liye phul se chhaale mangun

har nae moD pe chahun nae rishton ka hujum

har qadam par main nae chahne wale mangun

apne ehsas ki shiddat ko bujhane ke liye

main nai tarz ke KHush-fikr risale mangon

din ki saDkon pe saja kar nai subhen 'akmal'

shab ki chaukhaT ke liye aahani tale mangon