hijr ki shab ghaDi ghaDi dil se yahi sawal hai

hijr kī shab ghaḌī ghaḌī dil se yahī savāl hai

jis ke ḳhayāl meñ huuñ gum us ko bhī kuchh ḳhayāl hai

hā.e-rī bebasī shauq-e-dil kā ajiib haal hai

us kā javāb sun chukā phir bhī vahī savāl hai

ḳhvāb-o-fusūñ nahīñ to kyā dil ye junūñ nahīñ to kyā

ḳhalvat-e-dost aur tū terā kahāñ ḳhayāl hai

maiñ tire dar ko chhoḌ duuñ shart-e-vafā ko toḌ duuñ

soñch ḳhud apne dil meñ tū kyā ye mirī majāl hai

sharm sī nazar dil kī hai uThtī nahīñ nigāh-e-shauq

ishq kī manziloñ meñ ik manzil-e-infi.āl hai

chāheñge gar to dil kī baat aap hī jaan leñge vo

muñh se kahūñ to kyā kahūñ shakl mirī savāl hai

baat unhīñ kī maan lī jaise maiñ hī ḳhatā pe thā

un ko kahīñ ye shak na ho dil meñ mire malāl hai

ab tirī justujū huī himmat-e-dil ke hasb-e-zauq

tū ne ye jab se kah diyā ye talab muhāl hai

sat.h-e-mazāq-e-bazm par 'mullā' utar ke aanā to

auroñ kā jo kamāl hai tere liye zavāl hai

hijr ki shab ghaDi ghaDi dil se yahi sawal hai

jis ke KHayal mein hun gum us ko bhi kuchh KHayal hai

hae-ri bebasi shauq-e-dil ka ajib haal hai

us ka jawab sun chuka phir bhi wahi sawal hai

KHwab-o-fusun nahin to kya dil ye junun nahin to kya

KHalwat-e-dost aur tu tera kahan KHayal hai

main tere dar ko chhoD dun shart-e-wafa ko toD dun

sonch KHud apne dil mein tu kya ye meri majal hai

sharm si nazar dil ki hai uThti nahin nigah-e-shauq

ishq ki manzilon mein ek manzil-e-infial hai

chahenge gar to dil ki baat aap hi jaan lenge wo

munh se kahun to kya kahun shakl meri sawal hai

baat unhin ki man li jaise main hi KHata pe tha

un ko kahin ye shak na ho dil mein mere malal hai

ab teri justuju hui himmat-e-dil ke hasb-e-zauq

tu ne ye jab se kah diya ye talab muhaal hai

sath-e-mazaq-e-bazm par 'mulla' utar ke aana to

auron ka jo kamal hai tere liye zawal hai