hijr mein tere tasawwur ka sahaara hai bahut

hijr meñ tere tasavvur kā sahārā hai bahut

raat añdherī hī sahī phir bhī ujālā hai bahut

maañg kar merī anā ko nahīñ dariyā bhī qubūl

aur be-māñg mayassar ho to qatra hai bahut

ye to sach hai ki shab-e-ġham ko sañvārā tum ne

chashm-e-tar ne bhī mirā saath nibhāyā hai bahut

baat karnā to kujā us se ta.āruf bhī nahīñ

umr bhar jis ko har ik haal meñ sochā hai bahut

jaane kyuuñ mujh se vo katrā ke guzar jaatā hai

jis ne ḳhud mujh ko kabhī TuuT ke chāhā hai bahut

ham se fankār bhī is daur meñ kam hī hoñge

ham ne duniyā se tire ġham ko chhupāyā hai bahut

vo kahīñ mujh se taġhāful kā sabab pūchh na le

shaan aaj us ne mujhe ġhaur se dekhā hai bahut

hijr mein tere tasawwur ka sahaara hai bahut

raat andheri hi sahi phir bhi ujala hai bahut

mang kar meri ana ko nahin dariya bhi qubul

aur be-mang mayassar ho to qatra hai bahut

ye to sach hai ki shab-e-gham ko sanwara tum ne

chashm-e-tar ne bhi mera sath nibhaya hai bahut

baat karna to kuja us se taaruf bhi nahin

umr bhar jis ko har ek haal mein socha hai bahut

jaane kyun mujh se wo katra ke guzar jata hai

jis ne KHud mujh ko kabhi TuT ke chaha hai bahut

hum se fankar bhi is daur mein kam hi honge

hum ne duniya se tere gham ko chhupaya hai bahut

wo kahin mujh se taghaful ka sabab puchh na le

shan aaj us ne mujhe ghaur se dekha hai bahut