hijr taqdir nahin wasl ka wada bhi nahin

hijr taqdīr nahīñ vasl kā va.ada bhī nahīñ

ham ne khoyā bhī nahīñ aap ko paayā bhī nahīñ

ab vo vīrānī vo tanhā.ī vo gumnāmī hai

ab koī mujh se hai vābasta tamāsha bhī nahīñ

kabhī muskā.e kabhī ro.e tirī yādoñ meñ

bin tire maiñ ne koī lamha guzārā bhī nahīñ

vo na jaane kyoñ mohabbat kā gumāñ rakhne lagā

merī jānib se abhī aisā ishāra bhī nahīñ

ḳhud ko dīvāna mirā sab ko batātā hai magar

merā dīvāna mire naḳhre uThātā bhī nahīñ

merī tanhā.ī mujhe aur dikhā.egī bhī kyā

ab mire āsmāñ meñ ek sitārā bhī nahīñ

Duub jaanā hī muqaddar huā jaatā hai kyā

ab mayassar mujhe tinke kā sahārā bhī nahīñ

chārāgar phir tū bane kyoñ hai masīhā sab kā

mere zaḳhmoñ kā tire paas mudāvā bhī nahīñ

dil ke sahrā ko 'ananyā' jo banā.e gulshan

ḳhushk āñkhoñ meñ vo shādāb nazārā bhī nahīñ

hijr taqdir nahin wasl ka wada bhi nahin

hum ne khoya bhi nahin aap ko paya bhi nahin

ab wo virani wo tanhai wo gumnami hai

ab koi mujh se hai wabasta tamasha bhi nahin

kabhi muskae kabhi roe teri yaadon mein

bin tere main ne koi lamha guzara bhi nahin

wo na jaane kyon mohabbat ka guman rakhne laga

meri jaanib se abhi aisa ishaara bhi nahin

KHud ko diwana mera sab ko batata hai magar

mera diwana mere naKHre uThata bhi nahin

meri tanhai mujhe aur dikhaegi bhi kya

ab mere aasman mein ek sitara bhi nahin

Dub jaana hi muqaddar hua jata hai kya

ab mayassar mujhe tinke ka sahaara bhi nahin

chaaragar phir tu bane kyon hai masiha sab ka

mere zaKHmon ka tere pas mudawa bhi nahin

dil ke sahra ko 'ananya' jo banae gulshan

KHushk aankhon mein wo shadab nazara bhi nahin