ho aankh agar zinda guzarti hai na kya kya

ho aañkh agar zinda guzartī hai na kyā kyā

yuuñ aab meñ bujhte hue sho'le kī sadā kyā

ai tū ki yaqīñ hai tujhe shīshe ke badan par

ehsās kī dastak pe kabhī kaan dharā kyā

dīvār-e-tahī-naqsh har ik rang se māyūs

kāġhaz ke liye mū-e-qalam sañg bachā kyā

mahfūz hamīñ reg-hisāroñ meñ hue the

kyā varna samundar kā guzar mauj-e-havā kyā

vo shaḳhs mire saa.e se rakhtā hai ta'alluq

merā hī yaqīñ TuuT gayā us kā gayā kyā

us barf ke insān kī taḳhlīq mirī thī

is dhuup kī nagrī meñ mile us kā patā kyā

ḳhud tiir hadoñ meñ hoñ abhī sach hai ye 'manzūr'

us chashm-giraftār ko mānūñgā ḳhudā kyā

ho aankh agar zinda guzarti hai na kya kya

yun aab mein bujhte hue sho'le ki sada kya

ai tu ki yaqin hai tujhe shishe ke badan par

ehsas ki dastak pe kabhi kan dhara kya

diwar-e-tahi-naqsh har ek rang se mayus

kaghaz ke liye mu-e-qalam sang bacha kya

mahfuz hamin reg-hisaron mein hue the

kya warna samundar ka guzar mauj-e-hawa kya

wo shaKHs mere sae se rakhta hai ta'alluq

mera hi yaqin TuT gaya us ka gaya kya

us barf ke insan ki taKHliq meri thi

is dhup ki nagri mein mile us ka pata kya

KHud tir hadon mein hon abhi sach hai ye 'manzur'

us chashm-giraftar ko manunga KHuda kya