ho gae aangan juda aur raste bhi baT gae

ho ga.e āñgan judā aur rāste bhī baT ga.e

kyā huā ye log kyuuñ ik dūsre se kaT ga.e

ġham ne har ik rāste meñ khol rakkhā thā mahāz

ham bhī chehre par hañsī kā ḳhol le kar DaT ga.e

nafratoñ kī dhuup jhulsāne lagī har shaḳhs ko

pyaar ke us shahr meñ sab peḌ kaise kaT ga.e

Dar kī jab saarī haqīqat munkashif ham par huī

ḳhud-baḳhud Dar ke sabhī saa.e achānak haT ga.e

kaun jaane kis nasheman par girī haiñ bijliyāñ

kis taraf TuuTe hue tāroñ ke ye jhurmaT ga.e

mo'atabar hone lagīñ jab bazm meñ tārīkiyāñ

ḳhāmushī kī oT meñ ham log pīchhe haT ga.e

ghar se ai 'anjum' zarā bāhar nikal kar dekhnā

log kahte haiñ ki ab tārīk bādal chhaT ga.e

ho gae aangan juda aur raste bhi baT gae

kya hua ye log kyun ek dusre se kaT gae

gham ne har ek raste mein khol rakkha tha mahaz

hum bhi chehre par hansi ka KHol le kar DaT gae

nafraton ki dhup jhulsane lagi har shaKHs ko

pyar ke us shahr mein sab peD kaise kaT gae

Dar ki jab sari haqiqat munkashif hum par hui

KHud-baKHud Dar ke sabhi sae achanak haT gae

kaun jaane kis nasheman par giri hain bijliyan

kis taraf TuTe hue taron ke ye jhurmaT gae

mo'atabar hone lagin jab bazm mein tarikiyan

KHamushi ki oT mein hum log pichhe haT gae

ghar se ai 'anjum' zara bahar nikal kar dekhna

log kahte hain ki ab tarik baadal chhaT gae