ho gae tarik sae sham peDon ke tale

ho ga.e tārīk saa.e shaam peḌoñ ke tale

bāñsurī koī bajā.e shaam peḌoñ ke tale

ek anjāne nagar se soch rut kā devtā

aa gayā hai bin bulā.e shaam peḌoñ ke tale

garmiyoñ kā ik safar phir kaT gayā thak haar ke

din hai baiThā sar jhukā.e shaam peḌoñ ke tale

tere aa jaane se lamhe chalte chalte ruk ga.e

aaj yūñhī thak na jaa.e shaam peḌoñ ke tale

so ga.e haiñ phuul bhī Tahnī kā jhūlā jhūlte

loriyāñ koī sunā.e shaam peḌoñ ke tale

baaġh meñ koyal kī kū-kū jis tarah gorī koī

rūThe sājan ko manā.e shaam peḌoñ ke tale

aaj phir 'zāhid' bahut shiddat se aa kar us kī yaad

sabr merā āzmā.e shaam peḌoñ ke tale

ho gae tarik sae sham peDon ke tale

bansuri koi bajae sham peDon ke tale

ek anjaane nagar se soch rut ka dewta

aa gaya hai bin bulae sham peDon ke tale

garmiyon ka ek safar phir kaT gaya thak haar ke

din hai baiTha sar jhukae sham peDon ke tale

tere aa jaane se lamhe chalte chalte ruk gae

aaj yunhi thak na jae sham peDon ke tale

so gae hain phul bhi Tahni ka jhula jhulte

loriyan koi sunae sham peDon ke tale

bagh mein koyal ki ku-ku jis tarah gori koi

ruThe sajan ko manae sham peDon ke tale

aaj phir 'zahid' bahut shiddat se aa kar us ki yaad

sabr mera aazmae sham peDon ke tale