ho gaya patthar kaleja gham se dil ki dil mein hai

ho gayā patthar kaleja ġham se dil kī dil meñ hai

aa paḌī ab aur ik mushkil mirī mushkil meñ hai

sabr paḌ jaa.e na sāhib ḳhātir-e-nāshād kā

aap kī jo aañkh meñ hai vo hamāre dil meñ hai

ālam-e-fānī hai tasvīr-e-ḳhayālī sar-ba-sar

ablahī pinhāñ hamāre da.avā-e-bātil meñ hai

vasl kī shab hai ilāhī merī qismat so na jaa.e

niiñd kaisī rūnumā ye chashm-e-sangīñ-dil meñ hai

jā girā huuñ uTh ke masjid se maiñ kis kī raah meñ

ye kashish kis ke ruḳh-e-rashk-e-mah-e-kāmil meñ hai

fātiha ke vāste kaun aaya marqad par mere

chāñdnī kaisī merī is āḳhirī manzil meñ hai

jaan hai jab nazr-e-jānāñ maut se phir kyoñ Darūñ

jāntā huuñ zindagī merī kaf-e-qātil meñ hai

mol letā huuñ jarā.em haath gir aa.eñ na muft

rahm ne ummīd kyā bhar dī dil-e-ġhāfil meñ hai

aañkh bhī uThne nahīñ detā taġhāful us taraf

aur idhar us kā tasavvur har rag-e-bismil meñ hai

bhiik māñgī hai dar-e-jānāñ se dekho to zarā

husn kā zarra bhī koī kashtī-e-sā.il meñ hai

va.ada aane kā thā imshab kis ne rokā hai use

aag ye kis ne lagā dī ḳhirman-e-hāsil meñ hai

bahr behad hai kināra aa nahīñ saktā nazar

dil bahut ġhamgīñ ḳhayāl-e-dūrī-e-sāhil meñ hai

maiñ kahīñ rahtā huuñ mere dil meñ rahtā hai koī

bāvar aaya aur ik manzil mirī manzil meñ hai

Dartā huuñ maiñ Daal de us ko bhī mushkil meñ na dil

vo sitam-pesha mire dil meñ hai dil mushkil meñ hai

kis tarah nāyāb kū-e-nek-nāmī ho nasīb

haq ne badnāmī guñdhī āshiq kī āb-o-gil meñ hai

ho gaya patthar kaleja gham se dil ki dil mein hai

aa paDi ab aur ek mushkil meri mushkil mein hai

sabr paD jae na sahib KHatir-e-nashad ka

aap ki jo aankh mein hai wo hamare dil mein hai

aalam-e-fani hai taswir-e-KHayali sar-ba-sar

ablahi pinhan hamare dawa-e-baatil mein hai

wasl ki shab hai ilahi meri qismat so na jae

nind kaisi runuma ye chashm-e-sangin-dil mein hai

ja gira hun uTh ke masjid se main kis ki rah mein

ye kashish kis ke ruKH-e-rashk-e-mah-e-kaamil mein hai

fatiha ke waste kaun aaya marqad par mere

chandni kaisi meri is aaKHiri manzil mein hai

jaan hai jab nazr-e-jaanan maut se phir kyon Darun

jaanta hun zindagi meri kaf-e-qatil mein hai

mol leta hun jaraem hath gir aaen na muft

rahm ne ummid kya bhar di dil-e-ghafil mein hai

aankh bhi uThne nahin deta taghaful us taraf

aur idhar us ka tasawwur har rag-e-bismil mein hai

bhik mangi hai dar-e-jaanan se dekho to zara

husn ka zarra bhi koi kashti-e-sail mein hai

wada aane ka tha imshab kis ne roka hai use

aag ye kis ne laga di KHirman-e-hasil mein hai

bahr behad hai kinara aa nahin sakta nazar

dil bahut ghamgin KHayal-e-duri-e-sahil mein hai

main kahin rahta hun mere dil mein rahta hai koi

bawar aaya aur ek manzil meri manzil mein hai

Darta hun main Dal de us ko bhi mushkil mein na dil

wo sitam-pesha mere dil mein hai dil mushkil mein hai

kis tarah nayab ku-e-nek-nami ho nasib

haq ne badnami gundhi aashiq ki aab-o-gil mein hai