ho ke us kuche se aai to sitam Dha gai kya

ho ke us kūche se aa.ī to sitam Dhā ga.ī kyā

kuchh samajh meñ nahīñ aatā ki sabā pā ga.ī kyā

ye vahī merā nagar hai to mire yaar yahāñ

ek bastī mire pyāroñ kī thī kaam aa ga.ī kyā

merī sarhad meñ ġhanīmoñ kā guzar kaise huā

thī saroñ kī vo jo dīvār khaḌī Dhā ga.ī kyā

yuuñ to kahne ko bas ik mauj thī paanī kī magar

dekhnā ye haiñ ki pal-bhar meñ ġhazab Dhā ga.ī kyā

ba.ad muddat ke milā hai to mire yaar batā

terī āñkhoñ meñ jo ik barq thī kajlā ga.ī kyā

ab kisī baat meñ bhī jī nahīñ lagtā merā

dil meñ aa baiThī thī jo ḳhvāhish-e-duniyā ga.ī kyā

tazkire jis ke kitāboñ meñ paḌhā karte the

dekh bhaa.ī vo qayāmat kī ghaḌī aa ga.ī kyā

tere chehre pe 'umar' aaj ye raunaq kaisī

phir tabī.at koī mauzū-e-suḳhan pā ga.ī kyā

ho ke us kuche se aai to sitam Dha gai kya

kuchh samajh mein nahin aata ki saba pa gai kya

ye wahi mera nagar hai to mere yar yahan

ek basti mere pyaron ki thi kaam aa gai kya

meri sarhad mein ghanimon ka guzar kaise hua

thi saron ki wo jo diwar khaDi Dha gai kya

yun to kahne ko bas ek mauj thi pani ki magar

dekhna ye hain ki pal-bhar mein ghazab Dha gai kya

baad muddat ke mila hai to mere yar bata

teri aankhon mein jo ek barq thi kajla gai kya

ab kisi baat mein bhi ji nahin lagta mera

dil mein aa baiThi thi jo KHwahish-e-duniya gai kya

tazkire jis ke kitabon mein paDha karte the

dekh bhai wo qayamat ki ghaDi aa gai kya

tere chehre pe 'umar' aaj ye raunaq kaisi

phir tabiat koi mauzu-e-suKHan pa gai kya