ho KHumar itna ki haalat rahe sarshaari ki

ho ḳhumār itnā ki hālat rahe sarshārī kī

ye jo bad-mastī hai tauhīn hai mai-ḳhvārī kī

ab to baaqī na rahā koī shikāyat kā javāz

us ne rasman jo musalsal mirī ġham-ḳhvārī kī

ḳhvāhisheñ dil meñ vo fauran hī uThā detā hai

jab bhī tauba kī mire nafs ne ayyārī kī

muntazir kab se haiñ ham sub.h ke āsār nahīñ

jaane kab raat Dhale aur chhaTe tārīkī

yuuñ gumāñ thā ki mirī maan hī legā lekin

ek dīvār sar-e-rāh thī ḳhuddārī kī

bas ye kar sakte the ham aur bhalā kyā karte

sīñchā ashkoñ se chaman ḳhuun se gul-kārī kī

yuuñ tah-e-zāt hasīñ ḳhvāboñ ke manzar pā kar

aarzū ab na rahī auroñ kī ġham-ḳhvārī kī

tum to kahte the giraftār chalā āye.gā

us ne pahnī nahīñ zanjīr vafādārī kī

haiñ ġhazal meñ mirī pinhāñ ka.ī nukte 'ādil'

hai kahīñ lahja nayā aur kahīñ bārīkī

ho KHumar itna ki haalat rahe sarshaari ki

ye jo bad-masti hai tauhin hai mai-KHwari ki

ab to baqi na raha koi shikayat ka jawaz

us ne rasman jo musalsal meri gham-KHwari ki

KHwahishen dil mein wo fauran hi uTha deta hai

jab bhi tauba ki mere nafs ne ayyari ki

muntazir kab se hain hum subh ke aasar nahin

jaane kab raat Dhale aur chhaTe tariki

yun guman tha ki meri man hi lega lekin

ek diwar sar-e-rah thi KHuddari ki

bas ye kar sakte the hum aur bhala kya karte

sincha ashkon se chaman KHun se gul-kari ki

yun tah-e-zat hasin KHwabon ke manzar pa kar

aarzu ab na rahi auron ki gham-KHwari ki

tum to kahte the giraftar chala aayega

us ne pahni nahin zanjir wafadari ki

hain ghazal mein meri pinhan kai nukte 'adil'

hai kahin lahja naya aur kahin bariki