ho na iqrar to inkar pe Tale mujhko

ho na iqrār to inkār pe Taale mujh ko

us kā chup rahnā kahīñ maar na Daale mujh ko

kuchh guhar TuuT ke qīmat nahīñ khote apnī

maiñ agar TuuT ke bikhrūñ to uThā le mujh ko

maiñ anā chhoḌ ke aayā huuñ tire darvāze

hai jahāñ tak tirī had itnā jhukā le mujh ko

saañs ke pahle kahīñ TuuT na jaa.e ummīd

ab koī va.ada-e-fardā pe na Taale mujh ko

tere me.aar pai utrā huuñ na utrūñgā kharā

maiñ burā hī sahī ab tū hī nibhā le mujh ko

maiñ mohabbat kā rifāqat kā bharam rakhtā huuñ

jo mirā ho na sake apnā banā le mujh ko

ek ma.amūlī diyā huuñ maiñ sar-e-rāh-guzār

raah meñ jis kī añdherā ho jalā le mujh ko

maiñ ne rahbar se kahā ūñchā shajar ho tum bhī

bas usī din se paḌe jaan ke laale mujh ko

ho na iqrar to inkar pe Tale mujh ko

us ka chup rahna kahin mar na Dale mujh ko

kuchh guhar TuT ke qimat nahin khote apni

main agar TuT ke bikhrun to uTha le mujh ko

main ana chhoD ke aaya hun tere darwaze

hai jahan tak teri had itna jhuka le mujh ko

sans ke pahle kahin TuT na jae ummid

ab koi wada-e-farda pe na Tale mujh ko

tere mear pai utra hun na utrunga khara

main bura hi sahi ab tu hi nibha le mujh ko

main mohabbat ka rifaqat ka bharam rakhta hun

jo mera ho na sake apna bana le mujh ko

ek mamuli diya hun main sar-e-rah-guzar

rah mein jis ki andhera ho jala le mujh ko

main ne rahbar se kaha uncha shajar ho tum bhi

bas usi din se paDe jaan ke lale mujh ko