ho navishta ye bhī jaise kātib-e-taqdīr kā
kāġhazī hai pairahan har paikar-e-tasvīr kā
halqa-e-ahl-e-zabāñ meñ ḳhush huuñ maiñ ye dekh kar
munfarid lahja hai mere dost kī taqrīr kā
tā-abad samjhe na jis ko ibn-e-ādam kā dimāġh
juz koī aisā na ho yā-rab tirī tahrīr kā
hai tasavvur paas jis ke sair-e-ālam ke liye
kyā asar ho us ke paañv par kisī zanjīr kā
dūsroñ kī pagḌiyāñ bhī chāhtā hai chhīn luuñ
aadmī bhūkā hai kitnā apnī hī tauqīr kā
naam tak aayā nahīñ jin meñ kahīñ farhād kā
tazkira hai un kitāboñ meñ bhī jū-e-shīr kā
maiñ ne tan kī raushnī ko kam hī puujā hai 'kañval'
maiñ rahā shaidā hamesha ruuh kī tanvīr kā
ho nawishta ye bhi jaise katib-e-taqdir ka
kaghazi hai pairahan har paikar-e-taswir ka
halqa-e-ahl-e-zaban mein KHush hun main ye dekh kar
munfarid lahja hai mere dost ki taqrir ka
ta-abad samjhe na jis ko ibn-e-adam ka dimagh
juz koi aisa na ho ya-rab teri tahrir ka
hai tasawwur pas jis ke sair-e-alam ke liye
kya asar ho us ke panw par kisi zanjir ka
dusron ki pagDiyan bhi chahta hai chhin lun
aadmi bhuka hai kitna apni hi tauqir ka
nam tak aaya nahin jin mein kahin farhad ka
tazkira hai un kitabon mein bhi ju-e-shir ka
main ne tan ki raushni ko kam hi puja hai 'kanwal'
main raha shaida hamesha ruh ki tanwir ka
Source:
Dard Aashna (Pg. 95)
-
Author:
G. R. Kanwal
-
- Publisher: Lotus Books, New Delhi
- Year of Publication: 2006
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.