ho nazar aisi ki bas dil ki nigah tak pahunche

ho nazar aisī ki bas dil kī nigāh tak pahuñche

dil meñ utre to kabhī hāl-e-tabāh tak pahuñche

manzileñ un ko milā kartī haiñ āsānī se

tīrgī chhoḌ ke jo mish.al-e-rāh tak pahuñche

ab talak jaisī bhī guzrī hameñ manzūr magar

ab to ban jaa.e kuchh aisī ki nibāh tak pahuñche

jītnā ishq kī baazī koī āsān nahīñ

ain mumkin hai koī husn gavāh tak pahuñche

tishnagī ko mirī e.ajāz atā kar aisā

zer-e-lab pyaas baḌhe aisī ki aah tak pahuñche

ishq-maslak meñ 'sadaf' ek hī dastūr hai bas

zaḳhm-e-dil had se baḌhe aur karāh tak pahuñche

ho nazar aisi ki bas dil ki nigah tak pahunche

dil mein utre to kabhi haal-e-tabah tak pahunche

manzilen un ko mila karti hain aasani se

tirgi chhoD ke jo mishal-e-rah tak pahunche

ab talak jaisi bhi guzri hamein manzur magar

ab to ban jae kuchh aisi ki nibah tak pahunche

jitna ishq ki bazi koi aasan nahin

ain mumkin hai koi husn gawah tak pahunche

tishnagi ko meri eajaz ata kar aisa

zer-e-lab pyas baDhe aisi ki aah tak pahunche

ishq-maslak mein 'sadaf' ek hi dastur hai bas

zaKHm-e-dil had se baDhe aur karah tak pahunche