ho pareshan na koi kashT uTha mere liye

ho pareshāñ na koī kashT uThā mere liye

ye hī behtar hai ki tū duur ho jā mere liye

haa.e is baar bhī dhoka hī rahā mere liye

vo jo palTā to mujhe aisā lagā mere liye

maiñ ne is baat pe āḳhir ko baġhāvat kar dī

kitnī aa saktī hai piñjre meñ havā mere liye

saare pyāse the mire ḳhuun ke lekin pahle

aap andāza kareñ yaar uThā mere liye

maiñ ġhulāmoñ kī tarah aur hai shahzādī tū

apne har ḳhvāb kī qīmat na ghaTā mere liye

maut se baḌh ke tirā hijr mujhe kyā degā

aur tajvīz karo koī sazā mere liye

vo to achchhā huā tab hosh nahīñ thā 'sāhib'

varna maiñ kahtā ki duniyā na banā mere liye

ho pareshan na koi kashT uTha mere liye

ye hi behtar hai ki tu dur ho ja mere liye

hae is bar bhi dhoka hi raha mere liye

wo jo palTa to mujhe aisa laga mere liye

main ne is baat pe aaKHir ko baghawat kar di

kitni aa sakti hai pinjre mein hawa mere liye

sare pyase the mere KHun ke lekin pahle

aap andaza karen yar uTha mere liye

main ghulamon ki tarah aur hai shahzadi tu

apne har KHwab ki qimat na ghaTa mere liye

maut se baDh ke tera hijr mujhe kya dega

aur tajwiz karo koi saza mere liye

wo to achchha hua tab hosh nahin tha 'sahib'

warna main kahta ki duniya na bana mere liye