ho rahi hai is tasawwur se pareshani mujhe

ho rahī hai is tasavvur se pareshānī mujhe

aa.ina un ko udāsī degā hairānī mujhe

ḳhuun rulvātī hai ham-jinsoñ kī nādānī mujhe

vo ḳhatā karte haiñ hotī hai pashemānī mujhe

ho gayā hai aaj har insāñ zarūrat kā ġhulām

ab kisī talvār par miltā nahīñ paanī mujhe

ye huā aql-o-junūñ kī jang kā radd-e-amal

hukmrāñ miltī hai har bastī pe vīrānī mujhe

jab hiqārat se kisī ko dekhtā hai koī shaḳhs

kyā kahūñ hotī hai jo taklīf-e-rūhānī mujhe

jāntā huuñ zid na karnā pūchhne kī dosto

kis ke dar par ḳham milī hai kis kī peshānī mujhe

sar jhuke to bas na uThne kī qasam khā kar jhuke

mashvara ye de rahī hai merī peshānī mujhe

aaj ke zohra-jamāloñ kā tamaddun dekh kar

sar-nigūñ miltī hai bū-e-gul kī uryānī mujhe

imtihāñ letī hai qudrat haisiyat ko dekh kar

qahqahe un ko mile haiñ ashk-afshānī mujhe

chāñd tāroñ ke jahāñ meñ ghar banāne ke liye

āj-kal duniyā nazar aatī hai dīvānī mujhe

ab kisī kashtī ko dariyā meñ koī ḳhatra nahīñ

ḳhema-zan miltī hai har sāhil pe tuġhyānī mujhe

mai-kade kī baat hī kyā pūchhte ho dosto

mohtaram logoñ ke māthe par milā paanī mujhe

ishq to insāniyat ke imtihāñ kā naam hai

ho 'nihāl' is imtihāñ se kyoñ pareshānī mujhe

ho rahi hai is tasawwur se pareshani mujhe

aaina un ko udasi dega hairani mujhe

KHun rulwati hai ham-jinson ki nadani mujhe

wo KHata karte hain hoti hai pashemani mujhe

ho gaya hai aaj har insan zarurat ka ghulam

ab kisi talwar par milta nahin pani mujhe

ye hua aql-o-junun ki jang ka radd-e-amal

hukmran milti hai har basti pe virani mujhe

jab hiqarat se kisi ko dekhta hai koi shaKHs

kya kahun hoti hai jo taklif-e-ruhani mujhe

jaanta hun zid na karna puchhne ki dosto

kis ke dar par KHam mili hai kis ki peshani mujhe

sar jhuke to bas na uThne ki qasam kha kar jhuke

mashwara ye de rahi hai meri peshani mujhe

aaj ke zohra-jamalon ka tamaddun dekh kar

sar-nigun milti hai bu-e-gul ki uryani mujhe

imtihan leti hai qudrat haisiyat ko dekh kar

qahqahe un ko mile hain ashk-afshani mujhe

chand taron ke jahan mein ghar banane ke liye

aaj-kal duniya nazar aati hai diwani mujhe

ab kisi kashti ko dariya mein koi KHatra nahin

KHema-zan milti hai har sahil pe tughyani mujhe

mai-kade ki baat hi kya puchhte ho dosto

mohtaram logon ke mathe par mila pani mujhe

ishq to insaniyat ke imtihan ka nam hai

ho 'nihaal' is imtihan se kyon pareshani mujhe