hone ko jashn-e-fasl-e-bahaaran hue to kya

hone ko jashn-e-fasl-e-bahārāñ hue to kyā

do-chār phuul chāk-garebāñ hue to kyā

jab ābrū-e-bazm-e-mah-o-mehr luT chukī

palkoñ pe kuchh sitāre farozāñ hue to kyā

tā'bīr meñ mujhe ġham-e-insāñ to mil gayā

kuchh ḳhvāb sarf-e-gardish-e-daurāñ hue to kyā

sarshār-e-kaif zauq-e-numū hai chaman chaman

ahl-e-ḳhizāñ harīf-e-bahārāñ hue to kyā

tārīkī-e-shab-e-ġham-e-insāñ na miT sakī

ashkoñ se gaam gaam charāġhāñ hue to kyā

siine ke zaḳhm zaḳhm se phūTī haiñ koñpleñ

tārāj hasratoñ ke gulistāñ hue to kyā

jhukne se ābrū-e-jabīñ aur ghaT ga.ī

naqsh-e-sujūd laakh numāyāñ hue to kyā

hone ko jashn-e-fasl-e-bahaaran hue to kya

do-chaar phul chaak-gareban hue to kya

jab aabru-e-bazm-e-mah-o-mehr luT chuki

palkon pe kuchh sitare farozan hue to kya

ta'bir mein mujhe gham-e-insan to mil gaya

kuchh KHwab sarf-e-gardish-e-dauran hue to kya

sarshaar-e-kaif zauq-e-numu hai chaman chaman

ahl-e-KHizan harif-e-bahaaran hue to kya

tariki-e-shab-e-gham-e-insan na miT saki

ashkon se gam gam charaghan hue to kya

sine ke zaKHm zaKHm se phuTi hain konplen

taraj hasraton ke gulistan hue to kya

jhukne se aabru-e-jabin aur ghaT gai

naqsh-e-sujud lakh numayan hue to kya