hone ko to duniya mein hain kitne hi hasin aur

hone ko to duniyā meñ haiñ kitne hī hasīñ aur

lekin nahīñ tum jaisā koī zohra-jabīñ aur

tum paas rahoge to hifāzat se rahoge

is daur meñ koī bhī nahīñ mujh sā amiiñ aur

dozaḳh kā mujhe ḳhauf hai nai ḳhvāhish-e-jannat

ab kuchh bhī mohabbat ke sivā dil meñ nahīñ aur

kaisā ye junūñ hai mirā koī to batā.e

jaanā thā mujhe aur kahīñ pahuñchā kahīñ aur

gar ishq kī tāqat ko koī laa.e amal meñ

duniyā meñ banā saktā hai vo ḳhuld-e-barīñ aur

asrār haqīqat ke ayaañ mujh pe hue haiñ

ab ho gayā puḳhta mirā īmān-o-yaqīñ aur

shāyad ye hai me.arāj mire husn-e-nazar kī

vo duur bhī hote haiñ to lagte haiñ qarīñ aur

alfāz kī ḳhushbū meñ taḳhayyul ko basā kar

kahtā huuñ ġhazal un ke liye ek hasīñ aur

sadmāt 'azīz' itne uThā.e haiñ jahāñ meñ

shāyad ki na ho merī tarah koī hazīñ aur

hone ko to duniya mein hain kitne hi hasin aur

lekin nahin tum jaisa koi zohra-jabin aur

tum pas rahoge to hifazat se rahoge

is daur mein koi bhi nahin mujh sa amin aur

dozaKH ka mujhe KHauf hai nai KHwahish-e-jannat

ab kuchh bhi mohabbat ke siwa dil mein nahin aur

kaisa ye junun hai mera koi to batae

jaana tha mujhe aur kahin pahuncha kahin aur

gar ishq ki taqat ko koi lae amal mein

duniya mein bana sakta hai wo KHuld-e-barin aur

asrar haqiqat ke ayan mujh pe hue hain

ab ho gaya puKHta mera iman-o-yaqin aur

shayad ye hai mearaj mere husn-e-nazar ki

wo dur bhi hote hain to lagte hain qarin aur

alfaz ki KHushbu mein taKHayyul ko basa kar

kahta hun ghazal un ke liye ek hasin aur

sadmat 'aziz' itne uThae hain jahan mein

shayad ki na ho meri tarah koi hazin aur