honTon par main pyas ka dariya rakhta hun
hoñToñ par maiñ pyaas kā dariyā rakhtā huuñ
saat samundar ko sharminda rakhtā huuñ
saudā.ī huuñ sar meñ saudā rakhtā huuñ
pāgal huuñ jiine kī tamanna rakhtā huuñ
ḳhvāb-parinde mere āñgan tak bhī aa
muflis huuñ thoḌā sā daana rakhtā huuñ
bachchoñ kā mustaqbil jis se raushan ho
apne paas maiñ aisā nusḳha rakhtā huuñ
nā-dānoñ ko jā kar apne jaal meñ phāñs
maiñ to terā kachchā-chiTThā rakhtā huuñ
maktab jaisā ghar bhī apnā lagtā hai
saath meñ har dam ik hangāma rakhtā huuñ
hamdardī kā jazba 'sājid' dil meñ hai
duniyā bhar se pyaar kā rishta rakhtā huuñ
honTon par main pyas ka dariya rakhta hun
sat samundar ko sharminda rakhta hun
saudai hun sar mein sauda rakhta hun
pagal hun jine ki tamanna rakhta hun
KHwab-parinde mere aangan tak bhi aa
muflis hun thoDa sa dana rakhta hun
bachchon ka mustaqbil jis se raushan ho
apne pas main aisa nusKHa rakhta hun
na-danon ko ja kar apne jal mein phans
main to tera kachcha-chiTTha rakhta hun
maktab jaisa ghar bhi apna lagta hai
sath mein har dam ek hangama rakhta hun
hamdardi ka jazba 'sajid' dil mein hai
duniya bhar se pyar ka rishta rakhta hun
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
