hosh baqi na raha hath se iman gaya

hosh baaqī na rahā haath se īmān gayā

jo gayā bazm se terī vo pareshān gayā

un se dil mil gayā ulfat kā maza jaan gayā

vo mujhe achchhī tarah maiñ unheñ pahchān gayā

jin ke dam se thī bahār uTh ga.e vo ahl-e-chaman

dil ke bahlāne kā ab āḳhirī sāmān gayā

aarzū diid kī puurī na huī tā-dam-e-marg

terā āshiq tire kūche se pur-armān gayā

ham taḌapte rahe aur aap ne pūchhā bhī nahīñ

qasmeñ kyā ho ga.iiñ vo sab kahāñ armān gayā

aisā nārāz huā ḳhvāb meñ bhī aatā nahīñ

baat karne kā bhī us but se ab imkān gayā

sar tirī nazr kiyā ho ga.ī takmīl-e-vafā

ai sitamgar mire sar se tirā ehsān gayā

zer-e-turbat bhī taḌaptī rahī merī mayyat

dil se mere na tire ishq kā tūfān gayā

paañv shal ho ga.e lekin na pata terā milā

justujū meñ tirī maiñ tā-had-e-imkān gayā

zikr va.ade kā zabāñ par jo 'fazā' kī aaya

baat itnī sī thī lekin vo burā maan gayā

hosh baqi na raha hath se iman gaya

jo gaya bazm se teri wo pareshan gaya

un se dil mil gaya ulfat ka maza jaan gaya

wo mujhe achchhi tarah main unhen pahchan gaya

jin ke dam se thi bahaar uTh gae wo ahl-e-chaman

dil ke bahlane ka ab aaKHiri saman gaya

aarzu did ki puri na hui ta-dam-e-marg

tera aashiq tere kuche se pur-arman gaya

hum taDapte rahe aur aap ne puchha bhi nahin

qasmen kya ho gain wo sab kahan arman gaya

aisa naraaz hua KHwab mein bhi aata nahin

baat karne ka bhi us but se ab imkan gaya

sar teri nazr kiya ho gai takmil-e-wafa

ai sitamgar mere sar se tera ehsan gaya

zer-e-turbat bhi taDapti rahi meri mayyat

dil se mere na tere ishq ka tufan gaya

panw shal ho gae lekin na pata tera mila

justuju mein teri main ta-had-e-imkan gaya

zikr wade ka zaban par jo 'faza' ki aaya

baat itni si thi lekin wo bura man gaya