hosh mein aa ki be-KHabar daur-e-junun guzar gaya

hosh meñ aa ki be-ḳhabar daur-e-junūñ guzar gayā

vo na ab us kī rahguzar daur-e-junūñ guzar gayā

khīñchte the shabāb meñ ashhab-e-vaqt kī zamām

shauq javān hai magar daur-e-junūñ guzar gayā

shāna-e-fikr laayā huuñ chhīn ke hādsāt se

gesū-e-zindagī sañvar daur-e-junūñ guzar gayā

chāhne vaale sab tire naf-o-zarar ke ho ga.e

kyoñ na uThī tirī nazar daur-e-junūñ guzar gayā

mauj-e-balā guzar ga.ī kuchh to sukūñ kā saañs leñ

phir se banā.eñ apnā ghar daur-e-junūñ guzar gayā

sahl ho yā kaThin ho raah aao ab is pe chal paḌeñ

haat meñ haat ham-safar daur-e-junūñ guzar gayā

aql kī chāñdnī se ab duur talak hai raushnī

DhūñD ke lā na.ī sahar daur-e-junūñ guzar gayā

hosh mein aa ki be-KHabar daur-e-junun guzar gaya

wo na ab us ki rahguzar daur-e-junun guzar gaya

khinchte the shabab mein ashhab-e-waqt ki zamam

shauq jawan hai magar daur-e-junun guzar gaya

shana-e-fikr laya hun chhin ke hadsat se

gesu-e-zindagi sanwar daur-e-junun guzar gaya

chahne wale sab tere naf-o-zarar ke ho gae

kyon na uThi teri nazar daur-e-junun guzar gaya

mauj-e-bala guzar gai kuchh to sukun ka sans len

phir se banaen apna ghar daur-e-junun guzar gaya

sahl ho ya kaThin ho rah aao ab is pe chal paDen

hat mein hat ham-safar daur-e-junun guzar gaya

aql ki chandni se ab dur talak hai raushni

DhunD ke la nai sahar daur-e-junun guzar gaya