hosh-o-shakeb-o-tab-o-sabr-o-qarar pancho

hosh-o-shakeb-o-tāb-o-sabr-o-qarār pān.cho

qurbān kar chukā huuñ maiñ tujh pe yaar pān.cho

ik dard-e-hijr se bas ye pāñch ārize haiñ

be-hoshī be-qarārī ġhash tap buḳhār pān.cho

mutrib pisar ke ġham meñ bhāte haiñ kis ke dil ko

gorī aiman alabbā des aur malār pān.cho

īmān-o-dīn-o-māl-o-dil aur naqd-e-jāñ bhī

maiñ kar chukā huuñ pyāre tujh par nisār pān.cho

gar tū qasam bhī khaa.e jhūTe haiñ mere pyāre

paimān-o-ahd-o-va.ada qaul-o-qarār pān.cho

karte haiñ qatl-e-ālam zālim ye uzv tere

mizhgān-o-chashm-o-abrū zulf-o-'ezār pān.cho

kohsār-o-dasht-o-dariyā gulzār-o-bazm-e-ishrat

haiñ ḳhaar saañ nazar meñ be-rū-e-yār pān.cho

is tarah meñ ġhazal kā likhnā hai ġhair-mumkin

ai 'sehr' koī bāñdhe go ab hazār pān.cho

hosh-o-shakeb-o-tab-o-sabr-o-qarar pancho

qurban kar chuka hun main tujh pe yar pancho

ek dard-e-hijr se bas ye panch aarize hain

be-hoshi be-qarari ghash tap buKHar pancho

mutrib pisar ke gham mein bhate hain kis ke dil ko

gori aiman alabba des aur malar pancho

iman-o-din-o-mal-o-dil aur naqd-e-jaan bhi

main kar chuka hun pyare tujh par nisar pancho

gar tu qasam bhi khae jhuTe hain mere pyare

paiman-o-ahd-o-wada qaul-o-qarar pancho

karte hain qatl-e-alam zalim ye uzw tere

mizhgan-o-chashm-o-abru zulf-o-'ezar pancho

kohsar-o-dasht-o-dariya gulzar-o-bazm-e-ishrat

hain KHar san nazar mein be-ru-e-yar pancho

is tarah mein ghazal ka likhna hai ghair-mumkin

ai 'sehr' koi bandhe go ab hazar pancho