hota mumkin to fasane se miTa dete tujhe

hotā mumkin to fasāne se miTā dete tujhe

tū agar shaḳhs hī hotā to bhulā dete tujhe

tujh se milne kā ḳhayāl aatā rahā jaatā rahā

ye talab dā.imī hotī to batā dete tujhe

na mayassar thī ye fursat ki tujhe yaad kareñ

aur na thī utnī suhūlat ki bhulā dete tujhe

ham ne jo ḳhaas tire hī liye likkhe the vo she'r

itne bhī ḳhaas nahīñ the ki sunā dete tujhe

ḳhush huā jaatā hai tū jiit ke kis se 'fānī'

vo to khele hī nahīñ the jo harā dete tujhe

hota mumkin to fasane se miTa dete tujhe

tu agar shaKHs hi hota to bhula dete tujhe

tujh se milne ka KHayal aata raha jata raha

ye talab daimi hoti to bata dete tujhe

na mayassar thi ye fursat ki tujhe yaad karen

aur na thi utni suhulat ki bhula dete tujhe

hum ne jo KHas tere hi liye likkhe the wo she'r

itne bhi KHas nahin the ki suna dete tujhe

KHush hua jata hai tu jit ke kis se 'fani'

wo to khele hi nahin the jo hara dete tujhe