hote nahin hain dirham-o-dinar mere pas

hote nahīñ haiñ dirham-o-dīnār mere paas

do chaar baiThte haiñ magar yaar mere paas

maiñ vo banā chukā huuñ jise pūjte haiñ log

is se baḌā ho kyā bhalā shahkār mere paas

vāqif haiñ sang-o-ḳhisht nazariyāt se mire

ugtī nahīñ hai koī bhī dīvār mere paas

mujh ko jo rad kare vo ḳhabar mil nahīñ rahī

rakkhe hue haiñ barsoñ ke aḳhbār mere paas

tarjīh apnī apnī hai tahzīb ik sahī

rasmeñ tumhāre paas haiñ tehvār mere paas

aisā na ho ki ik bhī salāmat na rah sake

apne ḳhudā na laanā ḳhabar-dār mere paas

dushman kī jiit hai yā mirī fat.h hai 'shu'aib'

dastār us ke paas hai pindār mere paas

hote nahin hain dirham-o-dinar mere pas

do chaar baiThte hain magar yar mere pas

main wo bana chuka hun jise pujte hain log

is se baDa ho kya bhala shahkar mere pas

waqif hain sang-o-KHisht nazariyat se mere

ugti nahin hai koi bhi diwar mere pas

mujh ko jo rad kare wo KHabar mil nahin rahi

rakkhe hue hain barson ke aKHbar mere pas

tarjih apni apni hai tahzib ek sahi

rasmen tumhaare pas hain tehwar mere pas

aisa na ho ki ek bhi salamat na rah sake

apne KHuda na lana KHabar-dar mere pas

dushman ki jit hai ya meri fath hai 'shu'aib'

dastar us ke pas hai pindar mere pas